Махсус имкониятлар
“Пандемия... Карантин... Россияга кетиш йўллариям ёпилди. Энди рўзғорни қандай тебратамиз? Нимадир қилиш керак. Машинада такси қилай десам, йўллар ҳам ёпиқ. Ишлаб келган пулимизни эса таги кўриниб қолди.” Шундай ўй-ҳаёллар билан юрган Фурқатнинг уйига Нарпай тумани прокурори 2-сектор раҳбари Камолиддин Жавдановнинг кириб келиши билан унинг муаммоларига ечим топилгандек бўлди. Энди у ҳатто Россияга ҳам кетмайдиган бўлди.
Тадбиркорга айланган мигрант
5 йилдан бери Россияда вилоятларида 100-200 минг парранда боқиладиган фермаларда малакасини ошириб, мутахассисга айланган Хусанов Фурқатга ўрганиб келган тажрибаси карантинда асқатиб, прокурор тавсиясига кўра 180 млн. кредит олиб, ўз паррандaчилик фермасини ташкил этиб, тадбиркорга айланишига сабаб бўлди.
“Энди Россияга кетмайман”
Фурқат Хусанов, тадбиркор:
— Россияга кетолмадим. Уйдагилар ва сектор раҳбари билан маслаҳатлашиб, мошинамизни гаровга қўйиб, 180 млн. сўм имтиёзли кредит олдик. Бу ерлар ташландиқ ерлар эди. Ҳозирда шу ердан қурилиш қилиб, 2 500 бош парранда боқяпмиз. Иш бошланганига 15 кун бўлди. 40 кунда бу паррандаларимиздан 10 млн. сўмгача даромад олиш ниятимиз бор. Бу билан чекланиб қолганимиз йўқ. Фермамизни кенгайтиряпмиз. Насиб бўлса, товуқларимизни Россиядаги каби 100-200 мингтача етказаман. Энди Россияга кетмайман. Оилам олдида бўлиб, шу ишни ривожлантираман.
Энди унинг 6 нафар ишчиси ҳам бор
Фермасини кенгайтираётган Фурқатга қўшимча бинолар қуриш учун 6 та ишчи кўмаклашяти. Ойлик маошдан ташқари ишчилар янги бино қурилиши учун ҳар мингта қуйган ғишт учун 600 минг сўмдан маош олишар экан. Шулардан 2 таси “темир дафтар”га кирган эҳтиёжманд оилалардан жалб қилинган.
Битта жойдан икки тарафдан даромад
Актам Асланов, 40 ёш:
— Илгарилари иш чиққан жойларда ишлаб юрардик. Энди мана доимий иш билан таъминландик. 15 кундан бери шу ерда ишлаяпмиз. Ойлик маошимиз 1 млн. 200 минг сўм этиб белгиланган. Бундан ташқари, қўшимча паррандaчилик объектини қурилиши учун ҳам ғишт қуйиб, ҳар 1000 та қуйган ғиштимиз учун 600 минг сўм оляпмиз. Бизга қулай тарафи иккита ишимиз ҳам, даромад ҳам битта жойдан бўляпти.
Нарпай тумани прокурори Камолиддин Жавдановнинг айтишича, тумандаги “темир дафтар”га киритилганлар шу йўсинда аввалига тадбиркорга ишчи сифатида бириктирилади. Бу ерда улар тажрибасини оширгач, кейин ўзларига алоҳида 500-1000 та паррандачилик билан шуғулланиш учун шароит қилиб берилади. Хуллас, Фурқат Хусановга қарашли “Тоир бобо” фермер хўжалиги “темир дафтар”даги аҳоли учун паррандaчиликни ўрганувчи мактаб бўлиши режалаштирилган.
Хулоса ўрнида
Паррандачилик умуман олганда туман учун янгилик ҳисобланади. Шундай бўлса-да, иш аввалидан туманда 9 та паррандачилик фермер хўжалиги ташкил этиш режалаштирилган. Туманда камбағаллик билан курашиш бўйича ўзига хос механизм шаклланган. “темир дафтар”дан чиқариш бўйича бир томонлама ёндашилмаган. Бошқа ҳудудларда “темир дафтар”дан чиқариш керак экан деб, ўзини ўзи банд қилган аҳолини ҳам рўйхатдан чиқараётганларни ҳам кўряпмиз. Нарпайда эса бир эҳтиёжмандга ҳар ойлик турли кўринишдаги моддий ёрдамлардан ташқари мавсумий эмас, доимий даромадга эга бўлиш устида ҳам бош қотирмоқдалар. Нарпай тажрибасини ҳам бошқа ҳудудлар учун ўрнак қилиш мумкин.
Сардорбек Раҳмонқулов
darakchi.uz
