Tumandagi 1-sektor majlislar zalida qishloq xo‘jaligida 2024-yil sarhisobi hamda 2025-yilda amalga oshirilishi kerak bo‘lgan ishlarga bag‘ishlangan yig‘ilish bo‘lib o‘tdi.

Tuman hokimi Sherbek Buranov hamda tuman prokurori ishtirok etgan yig‘ilishda o'tgan 2024-yilda ayrim qishloq xo‘jaligi sohalari belgilangan rejalarni o‘z vaqtida bajarilmagani, xususan, dala madaniyati, yerlarni shudgorlash, fermer xo‘jaliklariga ajratilgan imtiyozli kreditlarni o‘z vaqtida so‘ndirish, ariq va zovurlarni qazish hamda betonlashtirish, ayrim g‘alla maydonlari sifatsiz holatda tayyorlangani, shuningdek, mahalliy hamda mineral o‘g‘itlar berilmagani jiddiy tanqid ostiga olindi.

Faoliyatida sustkashlikka yo‘l qo‘ygan mas’ullar ogohlantirilib, aniqlangan kamchiliklar yuzasidan qisqa muddatlarda bartaraf etish bo‘yicha topshiriqlar belgilab berildi.

Bundan tashqari, kirib kelgan 2025-yilda qilinishi kerak bo‘lgan dala chetlarini obodonlashtirib, ko‘chatlar ekish, g‘o‘za ekishda qishloq xo‘jaligi texnikalari 76x10 sxemada tayyorlash, zaruriy zamonaviy qishloq xo‘jaligi texnikalarini xarid qilish va bu orqali ekinlar hosildorligini oshirish, suv tejovchi texnologiyalardan foydalanishni yanada jadallashtirish, bunda tomchilatib, yomg‘irlatib sug‘orish, ariqlarni betonlash rejalarini oshirib bajarish, har bir massivga alohida agronom biriktirish va hosildorlikni oshirish orqali fermerlarning yuqori daromad olishiga imkon yaratish kabi dolzarb masalalar kelishib olindi.

Shu bilan birgalikda, mas’ul rahbarlarga muntazam ravishda belgilangan reja asosida monitoring qilib borish topshirig‘i yuklandi

Muhokama davomida davlatimiz rahbarining 2024-yil 30-dekabrdagi “Qishloq xo‘jaligi maydonlaridagi qo‘shimcha imkoniyatlardan foydalangan holda mahsulot yetishtirishni ko‘paytirishga doir chora-tadbirlar to‘g‘risida” PQ-465-sonli qarorining mazmun-mohiyati tushuntirilib, qaror ijrosini ta’minlash maqsadida barcha zaruriy choralar ko‘rilishi ta’kidlandi.